Essit sàbadu chi benit, su 4 de maju, in digitale e in casseta pro Talk About. E lu presentant sàbadu in una butega casteddaja de discos (Potente records de carrera de Santu Domìnigu). ‘In Mezzo’ est su tìtulu chi l’ant postu sos bator de La Città di Notte, Diego Pani, Andrea Schirru, Edoardo Meledina e Frank Stara (de pare in pare boghe, pianu, contrabbassu e bateria).
De ùndighi cantzones de custa essida noa, duas las connoschimus giai: 34.000 ore dae unu mese oramai e Bartolomeo dae pagas dies, ambas duas fintzas in formadu videoclip.
Custu discu nou marcat unu càmbiu de registru: si su primu issoro, s’omònimu de bator annos a como fiat prus una sìntesi de blues, jazz e cantzone italiana, immoe sa caminera pigada est sa de unu rock’n’roll prus cruu cun ghetu punk. “In Mezzo – narant – est una regorta de cantzones nàschidas in carrera in custos primos annos de sa banda, iscritas intre unu cuntzertu e s’àteru, chi movent dae ispetàculos e libros, dae istòrias non crèere e de personàgios ne in chelu ne in terra”.
Est a nàrrere? “Eroes sabotadores de sa segunda gherra mundiale (Bartolomeo), marineris in cherta de sa balena (Skin), registas de pellìculas de sèrie b (Il Re di San Sperate), pantasmas de su primu punk annos ‘70 (Blank Generation, cover de Richard Hell and the Voidoids, ndr), bluesman pecadores redimidos (Vieni con me) e fìgios de su note (34000 ore)”.
E galu: “Istòrias nieddas (Miseria, Valzer) chi pro su prus benint dae innedda (Gallardo, Tango Velenoso)”.
E comente est su discu gasi l’ant fatu, sonadu e deretu registradu in su Spazio Antas de Santu Sparau in intro de unu teatru minore a tretu de nos torrare, a nois totu cantos semus, una prenda sonada e suorada che chi l’aerent fata in unu cuntzertu live. A su bator. Ma sàbadu in Casteddu sa presentada ufitziale.
