Torrat in Otieri sa manifestatzione “Remembering Isio” dedicada a Isio Saba, fotògrafu e promoter otieresu nàschidu 81 annos a como. Mortu su 2013, fit una pessone nòdida in su mundu de su jazz italianu e internatzionale. A isse, cun su nùmene sou ligadu a sos de Lester Bowie, Don Cherry, Nanà Vasconcelos e a esperièntzias che a sa de s’Art Ensemble of Chicago, l’an finas dedicadu unu Prèmiu pro sa creatividade e s’innovatzione in cussu gènere lòmpidu a sa de tres editziones in intro de su festival internatzionale “Jazz in Sardegna” dae isse matessi co-fundadu.
In Otieri, invece, s’ammentu sou leat sa forma de s‘apuntamentu annuale organizadu dae s’assòtziu culturale Sa Ena cun su contributu finantziàriu pretziosu e abbistu de su Premio Ozieri di Letteratura Sarda (dae tempus impignadu in s’òpera sua de avaloramentu de sa cultura) e s’agiudu de realtades e istitutziones locales.
“Remembering Isio” est in programma pro sàpadu su 14 in su treatu cìvicu “Oriana Fallaci” dae sas 8 de sero. In su palcu su New trio de Dario Piccioni (contrabbassu e mùsicas), Jordan Corda (vibràfonu) e Francesco Merenda (bateria), binchidore de su già mentovadu Premio Isio Saba su 2022. In antis de su live de custa trìbide at a tocare a sos otieresos Jame’s Juice (Paolo Scodino boghe e chiterra, Michele Falzoi chiterra, Emilio Scodino tastieras, Luca Meledina bassu e Piergianni Meledina bateria).
Sos presentes, de pius, an a poder ascurtare su mezus de sa poesia sarda chi arrichit s’archìviu de su “Premio Ozieri” lòmpidu a sa de 64 editziones suas. Cussos versos, pro s’ocasione, an a esser resados dae sas carenas e dae sas boghes de duos letores de primore: sos giurados de su “Premio” Cristiano Becciu e Clara Farina.
S’ammentu de Iso Saba cun un’apuntamentu che a custu servit a dare ondras e omenàgios a unu trabagliadore de sa cultura de sa casta sua chi, pius chi non giòvanu, che giugheit su naturale sou otieresu in Roma ma lassende inoghe cussas raighinas dae ue brionein sos fèstival pius de importu in Sardigna. S’ammentu sou cun unu format che a custu torrat a ponner sizillu a cussu ligàmine istrintu chi b’est intre sa mùsica e sa poesia e intre su “Premio Ozieri” e totu sas formas de arte chi dan bantu a sa terra nostra.
Sa serada, intrada a s’indonu, l’at a presentare Antonio “Pippo” Saba.
