Sa bonànima de Zygmunt Bauman faeddaiat de duas tipologias de abitantes de custa terra: sos turistas chi podent mòvere dae totue e chi a totue podent lòmpere sena lìmites de ispàtziu e de tempus; sos vagabundos chi sunt obligados a mòvere dae su logu issoro ca est un’inferru. Àtera cosa est su biàgiu, cussa cunditzione chi non si podet paragonare a sa cantidade antròpica chi mudat in peus sos logos bisitados, ne a sas dudas e a sos oriolos giutos in butzaca dae una terra a s’àtera dae carenas turmentadas, cun s’ispera chi su peus siat a palas.
“Su biàgiu est comente una mama, ti lìberat dae totu sas timòrias, ti imparat a bìdere sas cosas in manera diferente, t’abbratzat cando ti paret chi ses solu”. Comintzat gasi (ma non pròpiu gasi ca bi l’amus traduida) sa cantzone ‘Viatge’ de Gionta i Ricardo, artistas aligheresos chi de custu petzu nd’ant fatu como unu vìdeu.
Su clip ‘Viatge’ est essidu su su 31 de ghennàrgiu in YouTube. Sas paràulas istèrridas e cantadas sunt unu messàgiu sotziale in ue su biàgiu est sa metàfora de s’iscoberta e de s’unione de sas persones cun s’ispera de unu mundu privos de gherra e cun sos muros ghetados a terra. “Est un’innu a s’umanidade – narant sos duos -, un’invitu a abbratzare sas diferèntzias e a iscontzare sas barreras chi nos partzint. Cun custu vìdeu bolimus contare sa galania de su biàgiu pro connòschere, amare e fraigare unu benidore de paghe”.
Su vìdeu l’ant giradu intre S’Alighera, Gènova, sa Catalugna e tretos de mare Mediterràneu “in ue sos paesàgios, sos colores e sas emotziones s’intramant a pare”. Ma ‘Viatge’ est fintzas una de sas deghe cantzone de su discu ‘Quan miraves a lluny’, essidu a concruos de s’annu coladu.
In s’album b’at cosa meda: s’ammentu de sa terra nadia, s’interinada in su mare lìgure de Boccadasse, s’istòria difìtzile de una fèmina, s’ammentu de una persone dispedida, sos turmentos de sa gherra e s’ispera de unu mundu fatu de amore e umanidade. Su discu est unu biàgiu sonoru lèbiu e dìligu, cun paràulas medidas e sonos chi nos bàntzigant in intro de sa trama cuntzetuale chi sos nostros ant intèssidu.
E gasi etotu lèbiu e dìligu naschet su discu, sende chi movet dae sa boghe sulena de Gionta (Antonio Francesco Daga su nùmene suo) e dae sos tastos biancos e nieddos de Riccardo Pinna. “Pro su prus – narant – l’amus pesadu movende dae sa boghe, dae sa loop station, dae pianoforte e dae tasteras. Ma a su discu bi collàborant fintzas Paolo Zuddas a sas percussiones, Salah Namek a su violontzellu, Dario Pinna a su violinu e Federico Morittu a su bassu”.
S’esòrdiu de Gionta, su 2019 a pustis de unas cantas collaboratziones, bi l’amus cun su progetu solista suo ‘Antonio F’ e cun s’ep ‘Space Monkeys’. Comente Gionta pùblicat imbetzes s’album ‘Eyes of a desperate soul’ su 2021 e s’ep ‘Madri, Figli e Spiriti Stanchi’ s’annu a pustis. Binchidore de sos cuncursos ‘Riflettori’ (de sa trasmissione televisiva omònima) e ‘Poetto Fest’, at collaboradu cun artistas comente Moses Concas e Claudia Aru.
Riccardo, chi istùdiat su pianu dae cando aiat ses annos, dae S’Alighera at postu raighinas in Gènova. Collàborat comente maistru sostitutu in sos teatros de òpera ma sa mirada sua est su prus de sas bortas indiritzada a sa mùsica populare e traditzionale cun atividades in Itàlia e àteros Paisos comente Tzina, Perù, Catalugna e Frantza. In pare cun issu, in sa lista de sas collaboratziones suas Franca Masu, Rosa Zaragoza, Montse Castellà, Il Volo, Mireja Vives, Borja Penalba, Fabio Armiliato, Ignazio Chessa e àteros. At fintzas pigadu parte a fèstival comente Barnasants e Time to Jazz pro su Time in Jazz.
Su progetu issoro naschet su 2023 e su matessi annu sa formatzione binchet sa segunda editzione de su cuncursu ‘CantAlguer’. Gionta i Riccardo proponent unu repertòriu originale in alguerés, variante locale de sa limba catalana, chirchende de aunire sas tratas culturales e musicales de su tempus coladu a su chi de nou b’at in contu de arrangiamentos, sonoridades e istrumentatzione. ‘Quan miraves a lluny’, essidu su mese de nadale e produidu dae Plataforma per la Llengua, l’ant presentadu in anteprima in s’Universitat catalana d’Estiu.
