B’at tempus finas a su 31 de maju pro pòdere pigare parte a sa de 65 editziones de su Prèmiu Otieri, su cuncursu literàriu nàschidu su 1956, 60 annos a pustis de sa prima gara intre improvisadores chi faeint in sa matessi bidda. Su bandu est essidu pagas dies a como e fintzas ocannu previdit tres setziones pro sos maistros de sos versos e de sos contos in limba sarda, gadduresa, turritana, aligheresa e tabarchina.
Sa prima setzione, intitulada a su linguista Antoni Sanna, est pensada pro sa ‘Poesia sarda‘ iscrita, in rima o mancu, cun argumentu lìberu (lìmite ùnicu su de sos 40 versos); sa segunda, ‘Prosa sarda‘, chi leat su nùmene de Toninu Ledda, su fundadore illustre de su Prèmiu, pertocat sos contos, non prus longos de chimbe pàginas A4 (corpus 12 e 2 tzentìmetros de oru); sa de tres, ‘Tra poesia e càntigu‘ in onore de s’improvisadore Antoni Cubeddu, inventore de sa gara a bolu, est sa chi aunit sos versos a su cantu poèticu tìpicu de sa traditzione sarda (“nìnnidos – leghimus -, atìtidos, glossas, cantadas in lira, gosos, cantones torradas, modas, modellos, mutos, repentinas etc.”).
Sos iscritores, chi ant a pòdere partetzipare a totu sas setziones (cun unu cumponimentu ebbia in ognuna), ant a dèvere imbiare su materiale issoro inèditu e mai premiadu o mentzionadu via mail a s’indiritzu info@premiozieri.it (inditende sa setzione in s’ogetu de su messàgiu) o impreende sa posta traditzionale (cun sa setzione inditada in sa busta) cun s’imbiu de sa còpia a s’indiritzu “Segreteria de su Prèmiu Otieri de Literadura Sarda Via Ugo La Malfa, 28 – 07014 Ozieri (SS)”.
Sos inditos sunt craros. Sos testos, difatis, cherent iscritos a màchina o cun su computer e devent inditare sas generalidades de s’autore (nùmene e sambenadu, data e logu de nàschida, indiritzu fìsicu e eletrònicu e cuntatos telefònicos). Sos organizadores no ant a ammìtere poesias e contos anònimos o cun pseudònimos. An a èssere imbetzes de agiudu pagas rigas biogràficas e sa tradutzione in italianu (in alternativa unu glossàriu de sas peràulas prus pagu connòschidas).
E in prus de sos organizadores, comintzende dae su presidente de s’assòtziu Vittorio Ledda e dae su diretore artìsticu Marco Fenudi, b’est sa giuria ghiada dae su Prof. Dino Manca, filòlogu de s’Universidade de Tàtari. Cun isse sa vice sua Anna Cristina Serra e sos giurados Cristiano Becciu, Antonio Canalis, Duilio Caocci, Clara Farina, Attilio Mastino, Riccardo Mura, Gianbernardo Piroddi, Simone Pisano, Gabriele Tanda, Salvatore Tola.
Sa matessi giuria chi in sa de 64 editziones at disinnadu de dare su primu prèmiu a Giangavino Vasco (autore de una poesia ìntima e suferente bantzigada dae sas undas de unu male), Natascia Muscas (chi at istèrridu unu contu de acontèssidas betzas ma atuales sende chi galu si morit traballende) e Dante Erriu (maistru de sos versos arretrogados e cantados).
Sa novidade est chi custa de 65 editziones cumbinat cun una faina noa. Chi nos la contat su presidente Vittorio Ledda: “Luego – narat – ant a comintzare sos traballos de classificatzione e de catalogatzione de totu sas òperas de su Prèmiu, dae su ‘56 a oe. In prus de sas poesias b’amus materiale fotogràficu, lìteras, verbales e comunicatziones iscritas intre giurados, rendicontatziones. Est a nàrrere s’istòria, una fotografia de su Prèmiu chi luego at a poder esser posta a disponimentu de amantiosos e chircadores”.
