“My Voice, My Choice”, comintzat sa campagna pro s’istrumada segura e atzessìbile in Europa

“Comente Strajk Kobiet Sardynia, tzèllula de su movimentu polacu Ogólnopolski Strajk Kobiet, firmatàriu de s’initziativa My Voice, My Choice cun Marta M. Lempart e Wschód, semus comintzende a collire firmas pro s’initziativa de is tzitadinos europeos chi punnat a garantire sa possibilidade de interrutzione de gravidàntzia a cada persone in s’UE“. A lu nàrrere est Carla Porcheddu (in sa foto), ativista sarda chi gherrat pro una “istrumada atzessìbile e segura comente diritu umanu fundamentale”.

“Sa campagna My Voice, My Choice – narat – dat a is tzitadinos europeos sa possibilidade de megiorare sa vida de sas persones prìngias pro chi siant prus lìberas e prus seguras, in cada logu nch’istent in s’Unione nostra, sena cunsiderare sas cunditziones issoro. Sa mancàntzia de custa possibilidade in unos cantos logos de Europa non cajonat dannos fìsicos ebbia, ma cundennat sas persones e sas famìlias (bortas medas aoradas e disamparadas) a unu stress econòmicu e psicològicu chi si diat pòdere evitare. Su de tratare s’assistèntzia riprodutiva comente unu lussu, est cosa prus chi non nòdida chi non riduet su nùmeru de interrutziones. Est gasi chi creschent sas istrumadas clandestinas“.

Pro custu est chi su movimentu est invitende sa Commissione europea a presentare, “cun ispìritu de solidariedade, una proposta de sustennu finantziàriu a sos istados membros pro chi si potzat garantire a chie si siat in Europa sa possibilidade de istrumare in forma legale e in cunditziones de seguresa“.

“Sa mancàntzia de custa possibilidade – serrat Porcheddu – truncat, iscussertat e annullat unu muntone de vidas e capatzidades de sussistèntzia. Totu custu cheret chi finat. Cun custa initziativa de is tzitadinos europeos amus a colare a una polìtica prus giusta chi dat espressione a sos valores europeos nostros in manera prus solidale e cuncreta”.