Fintzas ocannu sa manifestazione Monumenti Aperti at aciuntu in sa programatzione un giru in Castedd’e sus in is logos de s’avolotu contras a su sistema feudali de su regnu sabaudu de su 1794. S’atobiu, aprontau paris a s‘Assemblea Naztionale Sarda, est’istetiu programau po sabudu 26 a is 10 de mengianu in limba salda e dominiga 27 a sa matessi ora in limba italiana. Aus sigiu su giru in saldu e si oleus contari coment’est andau.
Is abisitadores e is abisitadoras si sunt’atobiaus in sa paltza Acquilino Cannas, in geca ‘e Porta Cristina, in su tretu ci s’imbucat in Casteddu’e sus de Bonucaminu. Sunt’istetius arricius de Nicola Piu, ci at presentau su sociu e is trabagius de A.N.S e de Gianluca Scalas ci at contau is istorias de s’avolotu accontessiu in Casteddu a paltiri de seu 28 de abrili ‘e su 1794, cun is iscritus isterrius de Roberta Olianas. A pustis de un’introdutzione istorica a pitzu de su Casteddu e de cumente su Principau de Savoia s’est fatu mere de su Regnu Saldu, su giru at moviu conc’a paltza Indipendentzia. A s’umbra de sa turri de Santu Francau su contadore at ispiegau sa funtzione istorica de su monumentu pisanu e coment’es passau in is seculus de essere palti de sa foltificatzione a logu ‘e presone. Atru tema est istetiu sa molte de Gerolamu Pitzolo, mudau in pagu tempus de eroe arrevolutzionariu e traitore de sa patria e occitu a cropos de lipedda, o cun duas ballas de arrevolvere, su contu non est craru, su ses de treulas de su 1795. Su fatu fiat istetiu imputau a tres ominis, talis Dias, De Lorenzo e Busu, ci, si narat tandu, faint palti,de una ghenga de arrevoltosos giacobinus ispiraus a is idealis de sa rivolutzione francesa de su 1789.
In sa segunda frimada, castiandu a craru sa lacuna e Molentalgius e su Gulfu de is Angelus, Gianluca Scalas at foeddau de is annus ainnantis de s’avolotu mannu, candu in su 1793 is soldaus de sa marina de sa giovana arrepubrica frantzesa, aiant provau a invadiri sa Saldingia e de cantu cuss’eventu siat istetiu de impoltu mannu po ispingiri is saldus a unu sentidu nou e a si ndi pesari, in su eranu e s’annu infattu, contras a s’antigu regimi feudeli. Su matessi sentidu ci aiat ispirau Franciscu Naziu Mannu po is veltzos de ‘Su Patriotu sardu a sos feudatorios‘, mengius connota comente “Procurare ‘e Moderare.
In sa paltza e su Palatziu su contu es torrau a sa dia de s’acciappa, candu su 28 de aprili is casteddgius de Stampaxi, Marina e Biddanoa si fiant arrevoltaus a is origas suldas de su re sabaudu, aiant sfundau is gennas de su Casteddu e incumentzau sa cassa de is istrangius, bogandudence 514 funtzionarius continentalis, e cun issus fintzas su visuré Balbianu, pinngaus in sa cresia de Santa Orrosalia , setzius in navi e agghiaus a Genoa. Po connoscere su strangiu in casteddagius pregontant: Nara Cixiri!, unu diciu passaau a s’istoria. Da se pronuntzia si podiat bene cumprendere cini fudi saldu e cini no. Podere de sa limba.
In sa paltza Carlo Alberto s’est arregionau inveces de is limidis de s’arrevolutzione casteddagia e de un’avolotu ci non podiat tennere un’incras de capia. Ancora una olta sa Saldingia non fiat a passu cun s’istoria e po cuntrastus intramesu is diveltzas animas de sa rivoluttzione, ci intressintus si fiat ispainada in totu s’isula. In s’utima frimada a sutta de sa turri e S’Elefanti s’argumentu est furriau a su contu de Giunni Maria Angioy, s’anima repubricana e progressista de sa rivolutzione salda, ci aiat depiu fari is contos cun sa timoria e is interessos de is nobilis saldus e cun sa reatzione de s’istadu sabaudu. Fuiu po no essere appicau in sa fruca de Vittoriu Amedeu e Tres, fiat andau fintzas a Paris, morendo esliau in su 1808. Cun sa congiura de Palabanda e sa cundanna de is arrevoltosos de su 1812 acabant is bisus e is disigius de libeltadi de sa gente salda. S’unicu ci non s’ind’incurat tandru ei como, est cussu elefanteddu appiccau in sa turri, che i su contu da Franciscu Altziator, abarrat cildinu, comente ci no ndi friga nudda de nemos, leandu su entu de is piemontesos, cun su runcu a mesudia e su culu a maistu, sigendo a contari is annus e is pressonas ci passant in su giassu de sa turri pisana, e fintzas un’atra editzione de Monumenti Aperti, ci cun custus atobius de impoltu, podet agiudari is saldus a tennere prus sentidu de s’issoro istoria e de s’issoro limba.
