“Moende dae sa poesia, mi soe postu a iscribere custos pagos contos inube de poesia e de poetas de sa bidda mia, Gavoi, b’at meda”. Est gasi chi a Pier Gavino Sedda l’agradat a comintzare su contu de sa faina sua, ‘Biazos. Tra poesia e storia locale’, publicada dae Carlo Delfino.
Su bibliotecàriu–tumbarinaju gavoesu nos presentat 12 capìtulos de istòrias de sa bidda barbaritzina comintzende dae sos chi sunt mòvidos a s’àtera ala de s’otzèanu. Ma in antis de faeddare de ‘Sos gavoesos in Argentina’, custu su tìtulu de su primu contu, Sedda nos ammentat de su gesuita Sarvadoranzelu Guirisi, classe 1725, lòmpidu a sas Filipinas in pare cun àteros duos: unu mamujadinu e unu tuilesu. Fiat pagu prus o mancu su 1752.
“Biazu longu – lèghimus –. An’a esser modios a bertula a coddu, cun casu, pane e binu ’e Mamujada e carchi cantu de lardu e de sartizza. Da uve dimoniu an’a esser colaos? Podet esser dae Genova, pustis a pede o cun carchi caddu, su biazu ad’a esser durau carch’annetto”.
E sighende·bi·la in sa letura podimus iscobèrrere nùmenes e aventuras de àteros gavoesos chi “nos ana lassau carchi poesia iscritta ’achende custos biazos: Mitri Urru, Micheli Lai e Sarvadore Sedda, fradile de Mitri Urru, chi iscriviana dae sa Merica, in Argentina. Totu gavoesos”.
A su capìtulu lu cùngiat pròpiu una poesia de Mitri Urru Liza (Demetrio Urru Deligia), cantzone de 22 otavas intitulada “I Gavoesi all’Argentina” e prena de nùmenes e sambenados istichidos in sos versos endecasìllabos: “Giuannantoni Sedda cun Corria / custu mundu si l’hana accunnortau / Pera Lavra Zuzurru Antoni Cau / lis est s’America una maladia / Pereddu Satta cun Rocca Mattia / ana Deus e terra frastimau / frades Dettoris cun frades Ginesos / mancu tra issos si sunu cumpresos”. E gasi sighende in ogni istrofa.
In sos àteros contos pòdimus pigare su nuscu de sa gastronomia locale, sos sonos de su carrasegare, sas fainas de sos ‘zillonarjos’, sas rimas de sos poetas locales, sas acontèssidas de sos bendidores ambulantes de furesi, de brìllias e de isprones. De custa manera sa poesia est duncas un’aina pro unu biàgiu cun prus destinatziones. Sos versos chi b’agatamus in intro ondrant unu contu chi cheret regortu e chistidu gasi comente regortu e chistidu l’at s’autore in su tempus chi b’at postu pro custu tessìngiu de ammentos.
Pier Gavino Sedda est nàschidu e pàschidu in Gavoi, in ue bi traballat comente bibliotecàriu dae su 1983. In su tempus coladu at regortu e publicadu retzetas de su connotu cun s’assòtziu S’Isprone; presidente de s’assòtziu de sos Tumbarinos, est parte ativa pro s’amparu de sa mùsica traditzionale e de su carrasegare.
“Sa poesia – serrat su nostru – m’est servìa po ’achere unu biazu, chenza d’ischire a ube andare a finire. Ma cada tantu, tirande s’alidu tra una poesia e s’atera, tra unu poeta e un’ateru, o tra ammentos istraccorjaos dae su tempus, podet bessire a campu, carchi portu inube si frimare, in custas tappas de sa vida chi est ’atta finas de poesia chi nos servit a narrer chi semus galu vivos”.
