Matthew Arnold, unu poeta inglesu de duos sèculos a como, naraiat chi sos che a issu “non bident a fundu ma a largu”. Como, in Otieri, b’at una mustra de ritratos de su bonu de sos intèrpretes sardos de su presente (in limba sarda e italiana, in forma iscrita e orale, improvisada, resada, cantada). ‘Sogni meridiani – Viaggio nella poesia contemporanea della Sardegna‘ si narat, e s’autore suo est Salvatore Lìgios, fotògrafu de Biddanoa Monteleone.
Organizada in intro de sas atividades a costàgiu de sa de sessantaghimbe editziones de su Prèmiu Otieri, l’amus a pòdere bìdere (mirende sas immàgines a fundu o a largu, a praghere nostru) finas a su primu de su mese de nadale, in su Museu tzìvicu archeològicu ‘Alle Clarisse’ in pratza de Baden Powell.
In sa mustra b’at 60 ritratos de grandu mannària: poetas de meledu, poetas a bolu, performer de poetry slam. E pròpiu pro custu in s’inauguratzione de su 25 de santugaine b’at àpidu finamentas unas cantas leturas cun duos poetas de casta diferente: Alessandro Doro e Maria Sale. Introduida dae sos saludos de su sìndigu de Otieri Marco Peralta, s’ocasione fiat bona pro una bella arresonada cun s’autore, porrogadu dae su segretàriu de su Prèmiu Marco Fenudi.
In prus de bìdere sas immàgines, sos presentes ant pòdidu assistere a un’arresonada fundunda in contu de poesia e de fotografia. A parre de Ligios, sunt duos limbàgios chi andant a manu tenta: “Su de sa fotografia, chi non chèrgio abarret isoladu, m’agradat a lu fàghere faeddare cun su de sa literadura; sunt duos còdighes narrativos chi, paris, formant una narratzione”.
S’autore at àpidu manera de chistionare de sa gènesi de sa mustra (e duncas de su volume omònimu imprentadu dae Soter): “Non so un’espertu de poesia e non cheria fàghere una classìfica de sos mègius, ma apo aprontadu custa campagna fotogràfica a tales chi b’apat tratas de custu fermentu. Cheria fàghere essire su mecanismu de sa cuotidianidade pro ingendrare meledos, pro chi chie las abbàidat non siat unu consumadore ma un’atore”.
A concruos de s’inauguratzione, e cunfirmende su ligàmene intre poesia e fotografias, su presidente de s’Aps Premio Ozieri Vittorio Ledda, at faeddadu de sos traballos de archiviatzione de sas poesias de su cuncursu dae su 1956 a oe, ma faghende finamentas mentovu de s’archìviu fotogràficu chi, una bia finidos sos traballos, at a lassare a sos amantiosos de sos versos e de sos autores issoro unu grandu iscusòrgiu.
Sa mustra est organizada dae s’assòtziu Premio Ozieri Aps cun patrotzìniu comunale e cun sa collaboratzione de s’Istituzione San Michele. Custos sos oràrios pro las pòdere ammirare: dae su martis a sa domìniga dae sas 9 a sa una e dae sa tres a sas sete de merie.
