Dae martis su 18 a gioja su 20 de martzu b’at àpidu tres apuntamentos faeddende de su progetu Einstein Telescope e de sa candidadura de su situ luvulesu de Sos Enatos. Nd’ant chistionadu in sa Manifattura Tabacchi de Casteddu, in sa Càmera de Cummèrtziu in Nùgoro e, in fines, in sa palestra comunale de Lùvula.
De prus, a costàgiu de custas initziativas, sa sede nugoresa de s’Istitutu entnogràficu Isre at ospitadu su momentu de sa firma de s’acòrdiu de programma cun is sìndigos de sas comunidades locales e de sos Comunes cabu de logu. S’ogetu de sa firma, cun sa presidente de sa Giunta regionale Alessandra Todde, fiat sa costitutzione de un’ischema de gestione a prus livellos pro sustènnere sa promotzione de sa candidadura de su situ.
A bisu de s’esponente màssima de sa polìtica regionale s’ET in Lùvula diat pòdere devènnere sa Silicon Valley de domo nostra: “Comente pro su situ californianu – at naradu –, in ue s’insediamentu de una comunidade de iscientziados cambieit de su totu s’istòria de s’Amèrica, dia bòlere pensare a una mudada che a cussa pro su territòriu nostru gràtzias a su progetu de s’ET”.
Sunt faeddos chi bi los amus traduidos; ma in custas dies, sena b’àere àpidu bisòngiu de la bortare, b’at essidu un’àtera nova. Dae su profilu suo, s’assessora regionale de s’Istrutzione pùblica e de sa Cultura Ilaria Portas at iscritu chi “s’Istitutu natzionale de Fìsica Nucleare at fatu ischire a sa Regione Sardigna, Servìtziu Limba e Cultura sarda, chi bolet un’agiudu pro iscrìere in limba sarda”. Pro iscrìere ite? Mentovada sa parte in sardu de su situ istitutzionale.
“Semus cuntentos meda de custa rechesta dae banda de su Infn – at naradu s’assessora Portas –. Pro sa Regione nostra e pro sa limba nostra est un’ocasione de importu mannu chi, deo e totu sa Giunta regionale, amus chèrfidu disfrutare. Una limba no est feti una regorta de faeddos. Non semus chistionende de pigare testos e de los torrare a prodùere o furriare in limba sarda. Una limba est una manera de arresonare, est una cultura, e chistit in intro de issa totu s’istòria de chie s’espressat cun cussu limbàgiu. Posca su progetu de s’ET giughet in fatu oportunidades mannas a beru pro sas pitzocas e sos pitzocos nostros, in prus de sa balia iscientìfica pro sa fìsica, sa cosmologia e s’astrofìsica”.
Sa nova tenet un’importu suo, sende chi de custa manera si diat pòdere torrare a pigare in cunsideru sa chistione terminològica chi agiudat sas limbas de minoria a sighire sas camineras de sa modernidade, ma chi est firma pro more de un’allega sena concruos in contu de istandardizatzione.
Su de s’ET est un’argumentu chi, fintzas pro more de sa cumplessidade sua, no est cada die in s’agenda de sos atores chi faeddant de sa Sardigna chi diamus chèrrere. S’ispera est chi fintzas in sos arresonos favorèvoles o dudosos, in contu de undas gravitatzionales e de cunsighèntzias pro sos territòrios nostros, su sardu si fatzat su logu suo.
