Notte, sant’Antoni meu
mi biza
Sas dies ant comintzadu a crèschere dae pagu, ma est in sos passos postecuinotziales de s’astru vitale nostru chi s’àstragu ierrile acudit presentende·si. A su nessi gasi si narat. Ca no est de badas chi pròpiu como festamus unu santu de su fogu, o unu fogu santu, cunforma a sa mirada e a su sentidu chi li damus. E cun su sole chi at in pessu finidu de allùghere su die de sa vigìlia, su note de su 16 de ghennàrgiu si prenat de un’àteru crarore.
Focos nuràchicos
de chinnìperu e chercos
d’éliches e de sarmentos
s’iscuru ispantan de rùiu
Custu narant sos versos de su poeta isilesu-nugoresu Predu Mura. S’operaju de lughe soliana, comente isse matessi si defineit intitulende unu cumponimentu nòdidu suo, in sa poesia ‘Prena sa notte ‘e crarore’ nos intregat forsis sa mègius immàgine de sa Sardigna chi cada annu brotat a pustis de s’interinada de su die in antis de Sant’Antoni, s’abate egitzianu turmentadu dae su dimòniu ma chi fureit sas framas a s’inferru pro caentare sa terra. E crarore siat.
Massàios e pastores
bardaneris
in cust’ora caente
de sardu jannàriu d’istiu
gosos de framas ti pesan
Custa festa no est antiga ebbia. Sas raighinas temporales chi nos oferint frùtora lòmpida cun tastos paganos si aunint a sas raighinas de su logu e a sos passos antròpicos de una tziviltàde agrària. Istiu de ghennàrgiu pro more de sas frascas allutas de romasinu, de sèlema o de mudegru, o de sos truncos boghende in antis framas e a pustis braja? O ghennàrgiu-ghenna de istiu, sende chi su carrasegare e sa carèsima imbenientes comintzant a manifestare unu tempus sena su fritu ierrile?
Frores sas caras alluttas
sutta sa notte isteddada
senza crarore de luna
prena sa nott’ ‘e crarore
de focos nuscantes d’erbas
e de boches chi paren trumbas
Ocannu sa prima luna prena est una deghina de dies a pustis de Sant’Antoni. E duncas su crarore est petzi su de sas framas allutas. E si fintzas sas caras sunt allutas a inghìriu de su fogarone, de su fogulone, de su ‘olone e de cada fogu chi mudat nùmene lassende su matessi sentidu, beru est finamentas chi b’amus caras caratzadas cun sas primas essidas issoro. Mamuthones e Issohadores in Mamujada, Boes e Merdules in Otzana, S’Orcu de Montiarvu in Thiniscole, Thurpos in Oroteddi, su Bundu in Orane e àteras. Cun boghes artziende·si·nche a chelu.
Sant’Antoni meu notturnu
tu ischis tépidu santu
sas marranias chi binchet
custu pedrosu cantu
de su bomboribò
Marranias, est a nàrrere disafios. Che a sos de sos pitzocos chi àrtziant a cùcuru de sas frascas in pessu allutas, belle in pare cun sa professone de su santu a inghìriu de su birde ammuntonadu sas dies in antis, pro nde falare una rughe ondrada de arantzu, comente faghent in Thiniscole. O sa versione fintzas prus perigulosa de Lodè artziende galu prus in artu, iscalende unu truncu de ocalitu artu 20-25 metros pro nde falare ‘sa pompia’. B’at chie binchet, ma sunt sas comunidades chi binchent cun cumbidos e promissas. Su fumu, lompende·nche a un’ala o a s’àtera, antìtzipat bundàntzias in sos campos o in sos paschìngios cun su tenore chi li pesat s’andanta in sas àeras.
A tibi Santu est su focu
offertu e sacrificau
a tibi Sardigna affido
a granu e a ispica:
su sìdiu si bibat s’abba
su sichizone sa morte
Custu note prenu de crarore est duncas su note de su santu de sos sartos e de sos sardos. Cun sas framas atzesas in bidda e cun s’unione de sas fortzas terrestres e suterràneas a sas de su sole. Cun su rituale inchesu pro chi b’apat laore e frutos pro sas comunidades. Cun cussu caddu de fogu, cun cussas caddaridas lugorosas, pro chi sos dimònios si nch’abarrent in tretos issoro.
Iscramenta Murguriò
Luguriò.
Unu cabaddu ‘e focu!
